هذه مجموعة من الصور لمدينة طرابلس واللي محتفظ بها من مدة و حبيت نشاركم اياها, و فيه مجموعة تانية من الصور لعدة مدن ليبية زي بنغازي, مصراتة, غريان, طبرق و غيرها و ان شاء الله في بوستات جاية تشوفوها …
ان شاء الله تعجبكم الصور و كل واحد يعرف وين منطقته و يقدر ميزها…
و هذه الصور الاولى لوصول الغزاة الطليان لليبيا و الحمد لله و ما قعد الا صورهم و ذكراهم السيئة
و اخيرا ان شاء الله عجبتكم المجموعة هادي و اكيد حتكون فيه مجموعات اخرى بعون الله في الايام القريبة ….
هذه الأيام تتداول أقاويل عن تسرب قاعدة بيانات إحدى شركات الهاتف المحمول في ليبيا , و التي تحوى جميع أرقام الهواتف بأسمائهم,و بذلك أصبح من السهل الحصول على الرقم بمجرد معرفة الاسم أو العكس.
فهل هذا يعني نهاية الخصوصية و هل يعني عدم الثقة في خدمات شركاتنا الموقرة ,و من هو المسئول عن هذا الخرق الخطير؟؟. و من هنا أطالب هذه الشركة بالتحقيق في الأمر و كشف المسئولين عن هذا العمل اللااخلاقي و محاكمتهم, كما أود تنبيه الجميع بأخذ الحذر من كل المكالمات المشبوهة و الأرقام الغير معروفة, فقد استغل ضعاف النفوس هذا الأمر لإزعاج الناس و استخدامه في ما لا يرضي الله.
الاربعاء الماضي كان هناك موعدا بين الابداع و الرومنسية في في المركز الثقافي الفرنسي.
حينما دعاني صديقي لحضورحفل موسيقي احياه كل من Clara Cernat & Thierry Huillet لم اتصور انني سوف انتقل لعالم من الجمال بعيدا عن الارض.
حيث نقلنا هذين العازفين الى عالم اخر من السحر، تناغم فيه الكمان و البيانو بإ ابداع.
عن نفسي وجدتني مستمتع و مندهش من هذا التوافق بين العازفين و سلاسلة العزف بدون أي أخطاء, واحببت شكر صديقي على دعوته الكريمة فالحفل كان رائع و الجميع وصل لدرجة من الاشباع الفني .
فقط كانت هناك اشكالية تمنيت لو انتبه إليها المسئولين , فانا تمنيت ان الحفل رعاته احدى الجهات الرسمية و وفرت قاعة مناسبة .
وما استغربته فعليا تغيب الإعلاميين و الصحفيين في صحفنا المحلية و إذاعتنا عن هكذا أمسية ، خصوصا وان هؤلاء العازفين عالميين و من الفنانين المعروفين مما وفر فرصة للترويج لبلدنا و ثقافتنا .
كثيرا ما دخلت في مناقشات و مجادلات مع بعض الإخوة العرب حول ادعاء بعضهم بان بلدنا ليبيا تفتقر لتاريخ يماثل أو يضاهي تاريخ بلدانهم , و نتيجة لعدم معرفتهم بتاريخنا فان البعض منهم يدعي ان ليبيا مجرد صحراء كانت خالية من أي حضارة باستثناء الحضارة الرومانية, و أنها لم تشهد أي نوع من العمران و مظاهر الحضارة الا بعد اكتشاف النفط, اما عدا ذلك فانها ارض تسكنها قبائل اعتاشت على الرعي و قطع الطرق على حد قول الكثير منهم.
لا الوم هؤلاء فحتى نحن ما زلنا نجهل الكثير عن تاريخنا, فإعلامنا غائب تماما و كتبنا و مناهجنا الدراسية كرست لتعليم و تلقين حضارة و تاريخ الوطن العربي, فحين تجاهلت الحضارة الليبية القديمة و لهذا نجد معظمنا مبهورا بما يقوله الاخرون و لا يعلم بان لديه ما يبهر بيه الاخرين.
احببت ان اشير لبعض الحقائق التاريخية حول تاريخ ليبيا, فهل يعلم هؤلاء بان اسم ليبيا ضارب في القدم, و هل يعلم هؤلاء:
- ان اقدم مومياء محنطة هي مومياء مون هجاج و التي اكتشفت في جبال اكاكوس الليبية و ان تاريخ تحنيطها يعود الى ما قبل 5500 سنة أي قبل ان يعرف الفراعنة التحنيط بالف و خمسمائة سنة., كما وجدت نقوش من اقدم نقوش العصور القديمة في نفس المنطقة..
- أن اسم ليبيا اطلق على كل افريقيا و قد ذكرها هيروديت في عدة مواضع و عنى بها إفريقيا بأسرها , كما وضع اسم ليبيا في الخرائط القديمة على كامل الجزء المعروف من افريقيا في العصور القديمة .
- ان الاسرة الثانية و العشرون الحاكمة في مصر اسسها الملك الليبي شيشنق و حكمت هذه الاسرة مصر لاكثر من قرنين.
- ان الامبراطور لوشيوس سيبتموس سيفيروس امبراطور روما هو ليبي الاصل و المولد.
- ان أول بلد يتعرض لقصف من الجو هي ليبيا حين قصف الطليان مواقع للمجاهدون في ليبيا في اول استخدام للطائرة في الحروب, كما أن صحراء ليبيا شهدت استخدام الدبابات لأول مرة في معارك الصحراء, ليس بغريب فليبيا ارض الجهاد و بلد المختار.
- ان اسم ليبيا مسجل في كتاب جينيس اكثر من مرة , في ليبيا اكبر منظومة ري حسب كتاب جينيس و يقصد بيه النهر الصناعي , و في ليبيا سجلت اعلى درجة حرارة في الظل على وجه الارض في منطقة العزيزية ايضا حسب جينيس..
- ان ليبيا ذكرها الفيلسوف اليوناني ارسطو بقوله الشهير " من ليبيا ياتي الجديد" “Aεὶ Λιβύη φέρει τι καινόν”
و اخيرا و ليس اخر تتشرف ليبيا بضم رفات 70 من شهداء المسلمين من صحابة رسول الله صلى الله عليه و سلم , و تتشرف ليبيا و تفتخر بان كل اهلها مسلمون و مازلنا نتمسك بتقاليدنا الإسلامية و الحمد لله , فكما قال عمر بن الخطاب رضي الله عنه " نحن قوم اعزنا الله بالاسلام فإن ابتغينا العزة بغيره أذلنا الله"..
و الحمد لله اني ليبي و ليا الفخر اني أكون من هذا البلد العريق....
بصراحة مش عارف من وين نبدا...... بس الشئ اللي شوفته ازعجني هلبا و حبيت نتكلم عليه
نهاية الاسبوع الماضي و كالعادة طلعت اني و اصدقائي نتمشو في طرابلس يعني حاجة تكسر الروتين اليومي , المهم و حني ماشينا شوفنا زحمة كبيرة بجانب سوق الثلاتاء الجديد و لما قربنا اتضح الامر , سيارة تشتعل فيها النار !!؟؟ و الناس تتفرج
السيارة كانت لعائلة ليبية على قد الحال زي حال معظم الليبين, العائلة الليبية هادي اللي ان شاء الله ربي يعوضهم خير الباين كانو ماشين للسوق بس للاسف صار اللي صار
الشئ المؤسف في القصة بالاضافة لخسارة السيارة , كان رد فعل الناس اللي كانت تتفرج و الكل كان يصور بالموبايل في منظر اقل ما يقال عنه انه شماتة و بروووووووووود امام العائلة اللي كانت الدموع و الحسرة في عيونهم
بكل صراحة حني الليبين و الله ما كنا هكي ابدا , معقولة الناس تصور و مستمتعة بالمنظر!! شن هي الحكمة من انك تصور المنظر؟؟ يعني خلاص بتوريه لاصدقائك و بتضحكو عليه او بتنزله في اليوتيوب او ممكن ببتبعه لوحدة من القنوات اللي تعرض في الهوم مايد فيديو ؟؟؟؟
و لما وصلت سيارة المطافي الناس مازالت متجمهرة و مش مهتمة و السيارة لقت صعوبة باش تطفي النار و بارك الله في بعض الناس اللي كانت تنبه لضرورة فتح الطريق لسيارة المطافي
الاسوء من هكي اني كنت نتوقع ان هادي حالة شاذة بس اللي عرفته من ناس كثيرة ان التصوير بالموبايل في اوقات الحوادث و الكوارث اصبحت ظاهرة في ليبيا و تقليد و ان فيه اكثر من مقطع بلوتوث فيه صور لحوادث , واحد قال ا ن اول ما يحصل الحادث في ليبيا تلقى الناس بالعشرات كان مش بالمئات تصور يعني ماشاء الله كلنا ولينا اعلاميين و زادت عندنا هواية التصوير
أتمنى ان تختفي الظاهرة هادي و تبتعد الناس عليها , و اللي مش قادر يمد يد المساعدة من الافضل يبعد و يخلي الناس المختصة هي اللي تساعد
و في الختام الحمد لله على سلامة العائلة صاحبة السيارة و ربي يعوضهم
و ان شاء الله ربي يصلح الحال
