التصوير بالموبايل .... هواية ام ظاهرة؟؟

بصراحة مش عارف من وين نبدا...... بس الشئ اللي شوفته ازعجني هلبا و حبيت نتكلم عليه

نهاية الاسبوع الماضي و كالعادة طلعت اني و اصدقائي نتمشو في طرابلس يعني حاجة تكسر الروتين اليومي , المهم و حني ماشينا شوفنا زحمة كبيرة بجانب سوق الثلاتاء الجديد و لما قربنا اتضح الامر , سيارة تشتعل فيها النار !!؟؟ و الناس تتفرج

السيارة كانت لعائلة ليبية على قد الحال زي حال معظم الليبين, العائلة الليبية هادي اللي ان شاء الله ربي يعوضهم خير الباين كانو ماشين للسوق بس للاسف صار اللي صار

الشئ المؤسف في القصة بالاضافة لخسارة السيارة , كان رد فعل الناس اللي كانت تتفرج و الكل كان يصور بالموبايل في منظر اقل ما يقال عنه انه شماتة و بروووووووووود امام العائلة اللي كانت الدموع و الحسرة في عيونهم

بكل صراحة حني الليبين و الله ما كنا هكي ابدا , معقولة الناس تصور و مستمتعة بالمنظر!! شن هي الحكمة من انك تصور المنظر؟؟ يعني خلاص بتوريه لاصدقائك و بتضحكو عليه او بتنزله في اليوتيوب او ممكن ببتبعه لوحدة من القنوات اللي تعرض في الهوم مايد فيديو ؟؟؟؟

و لما وصلت سيارة المطافي الناس مازالت متجمهرة و مش مهتمة و السيارة لقت صعوبة باش تطفي النار و بارك الله في بعض الناس اللي كانت تنبه لضرورة فتح الطريق لسيارة المطافي

الاسوء من هكي اني كنت نتوقع ان هادي حالة شاذة بس اللي عرفته من ناس كثيرة ان التصوير بالموبايل في اوقات الحوادث و الكوارث اصبحت ظاهرة في ليبيا و تقليد و ان فيه اكثر من مقطع بلوتوث فيه صور لحوادث , واحد قال ا ن اول ما يحصل الحادث في ليبيا تلقى الناس بالعشرات كان مش بالمئات تصور يعني ماشاء الله كلنا ولينا اعلاميين و زادت عندنا هواية التصوير

أتمنى ان تختفي الظاهرة هادي و تبتعد الناس عليها , و اللي مش قادر يمد يد المساعدة من الافضل يبعد و يخلي الناس المختصة هي اللي تساعد

و في الختام الحمد لله على سلامة العائلة صاحبة السيارة و ربي يعوضهم

و ان شاء الله ربي يصلح الحال